股海實戰錄:淡友力質地產股

蘋果日報 2002/08/06 08:00


滙控(005)及恒生(011)噚日早段造好,港股唔多願跌,但期指升至9930受阻,開始回頭,趙飛雲喺0.225元買入60萬份恒指Put輪9205,尾市見期指跌至9750唔穿反彈,先沽出一半獲利,留番一半過夜,博滙控業績冇驚喜及美股繼續跌。
收市後滙控公布中期業績,純利32.8億美元,僅跌7.3%,較市場預期佳,不過主席龐約翰就話下半年經濟未見樂觀,另外滙控呆壞帳撥備水平較分析員預期稍低,因此估計滙控反彈幅度有限。不過若勢色唔對,恒指Put輪9205亦要先跳車。
噚日跌得最重係地產股,新地(016)低價開售馬灣珀麗灣,市場憂慮大地產商又展開減價戰,淡友力質地產大藍籌,成為午市恒指跌幅擴大主要原因。

恒地創今年新低
恒地(012)噚日低位28.60元,再創今年新低,新地(016)及長實(001)稍好,亦只係保持未破底。短期要留意地產股會否繼續尋底還是見底反彈,若是向下尋底嘅話,恐怕單憑滙控未必撐得住港股。中移動(941)雖受中國電信上市消息影響,但股價唔算跌得太急,仍守住10日線21.08元之上收市。港股短期有冇轉勢機會,長實、新地及中移動走勢會有好大啟示。
趙飛雲