新車速報：
萬事得CapellaSilver「銀色旋風」襲港
蘋果日報 2002/01/12 00:00
為慶祝香港萬事得汽車成立25周年紀念，代理近期特意引入東瀛本土特別版嘅CapellaSilver，包裝較傳統626優越之餘，多項升級配搭加埋唔到13萬嘅車價，可謂開創日本中型轎車嘅超低價先河；睇嚟呢股「銀色旋風」，確實魅力沒法擋噃！
記者、攝影：陳偉林
記者、攝影：陳偉林
我呢部為慶祝香港萬事得汽車成立25周年，而推出嘅CapellaSilver特別版，包裝及配套可謂一應俱全，除較身後嘅原裝626更突出外；兼且可以用唔使13萬嘅價錢，擁有中級轎車嘅享受，夠吸引喇啩？
原有626車系，早已係一款同級超值吸引嘅兩公升轎車；但相比於剛啱抵港嘅日本本土版CapellaSilver，後者可謂更勝一籌。既有齊同色防撞腰線，又有電鍍門邊鏡及四輪15吋合金軨組合，響同級車中可謂無出其右㗎！
1.四門腳踏加有電鍍裝飾，倍見雅潔。
2.屬本土特別版嘅CapellaSilver，有強化供電裝置，可應用於極寒地帶。
3.四輪15吋跑車合金軨組合，更添活力。
4.電鍍門邊鏡外殼，貴氣十足。
5.尾喉加有電鍍裝飾，更見動感。
6.指揮燈加有銀白框邊，好有大車風範。
打開車門所見，前後兩排皆以高級絲絨配襯，有軟滑貼服嘅享受之餘，前後排重各設有大型中央手枕，而左前方乘客椅背重可以收摺成桌几，真係好實用㗎！除四門電窗、門邊電鏡及中央門鎖外，重有大型電天窗、原廠恒溫冷氣，以及新增10碟CD音響組合，你又怎可以抗拒呢分誘惑呢！
特別版嘅CapellaSilver沿用一台慳油嘅2.0公升直4DOHC偈，性能輸出略較香港版626優勝之餘，原來佢本身重有特大供電裝置，大可應付高耗電量嘅音響組合㖭！講到操控，新車軟硬適中嘅懸掛結構，可畀到你有穩妥感呢！