《分手100次》連日嚟喺內地多個地方舉行謝票,而喺近日,終於返到嚟主場香港喇。
日前鄭丹瑞、鄭伊健同埋周秀娜就穿梭港九多間戲院謝票,大派禮物,仲同觀眾討論劇情同結局。
伊健仲即場做民意調查,問觀眾認為男女主角應否復合?觀眾就議論紛紛,仲有觀眾睇到結局之後感觸落淚,娜姐特別送電影報畀佢哋,安撫心靈。
喺其中一場謝票,旦哥同伊健忍唔住爆料,指娜姐一句說話改變電影結局。伊健話:「當日我哋拍結局嗰場過馬路戲,原定只係我一個人過馬路,留下『波波姐』(娜姐角色匿稱)喺原地。準備roll機之際,佢喺隔離話:『咁就冇啦?好慘呀!』」
娜姐話因為當時覺得男女主角即將分手感到好可惜,一時感觸自言自語,冇諗到俾伊健聽到。
旦哥笑住話:「原來伊健好八卦,聽到娜姐咁講,就走嚟向我建議另一個拍法。原本我諗住拍完快啲收工,但又唔想嘥時間同佢拗,於是照佢哋意思拍多一take,我剪咗佢哋都唔知啦!點知當我睇重播時毛管戙,而剪接師破例打電話畀我去評論呢個結局。多謝伊健和娜姐對電影嘅投入,先至有神來之筆嘅結局!」
喺最後一站嘅謝票,旦哥就拉埋錢嘉樂去,嘉樂笑住話:「我為咗旦哥獻出從影廿幾年嚟第一次去戲院謝票,喺戲裡亦係第一次有愛情線,而且仲唔止有一個女人,有婚外情,大家都知喺現實生活,呢啲事冇可能會發生喺我身上。」