港股下一站目標28000點！點解咁樂觀？坊間所持嘅睇好理據不外乎內地經濟復蘇、銀根漸鬆、中資股重估潮、滬港通啟動、資金持續流入，咁多好消息共冶一爐，想反問睇25000點係咪太保守？中資股半紅不黑，一直係港股金融海嘯後有波幅冇升幅嘅關鍵，如果以上好消息能夠同時間發酵，28000點絕對不是夢。

洛鉬有力見8蚊

為何是28000點，假設恒指能成功衝穿25000點，圖表走勢上已可再度挑戰32000點高峯，純綷計數，一半路程正好落在28000點。有星級基金經理舊年夠膽話樓價兩年跌五成，估恒指見28000點，其實好保守。
內地炒復蘇，近年樣衰到爆嘅資源股乘機炒鑊金，稀有金屬股洛陽鉬業（3993）上周五炒高6.7%，收報5.13元，靚破5蚊阻力區，周線圖呈大圓底走勢，有力見8蚊！從基本因素出發，洛鉬強勢有根有據，路透社引述歐亞業界人士指，中國買入2,700噸氧化鉬，為20年來首次，洛鉬率先受惠。A股現價7.25元人民幣，H較A折讓44%，AH差價指數報90點，即平均折讓一成，洛鉬H股大落後，追回差價要見8.21元，與圓底頸線8元水平相若。
同場加映世紀陽光（509），公司除肥料業務外，亦有產銷鎂合金，可以當半隻資源股炒，日線圖已行至三角形末端，上周五搶高3%，一旦破位又會升到你唔信，絕對要兼顧。

唐牛
https://www.facebook.com/tongcow88