台灣消息稱,吳敦義見嘅風水師姓陳,八方知道後嚇一跳,莫非哨牙通重出江湖,做埋台灣「國師」?後來再三打聽,據講陳姓風水師應該另有其人,可能係蘇民峰大弟子陳子才,富豪御用風水師陳朗兒子陳嘉龍,或者鐵板神算陳康泰。
八方噚日聯絡唔到陳嘉龍,陳子才則同八方講近日冇見過吳敦義,陳康泰就話不方便透露客人私隱,不證實亦不否認有冇同吳敦義接觸。升官前長途跋涉搵人算命,難道吳敦義要靠風水治台?不過佢強調自己已經61歲,早知天命,只係個仔想卜算前程。
吳敦義香港行風波持續,遭到圍攻佢話好心酸,民進黨批評佢唧牙膏式交代,誠信可疑,愧對台灣;國民黨就思疑係「藍皮綠骨」內鬼爆料。另一男主角梁振英卻甚風騷,噚晚現身一個酒會見到江素惠,講笑話快啲嚟見佢,因為見完佢就會升官!
台灣藍綠傾軋,香港雖然隔岸觀火,煲呔唔應該蹺埋雙手,最好食住個勢,唔係插手對岸政治,佢冇咁叻,而係加大力度發展香港嘅風水命理玄學產業,將香港建構成大中華堪輿術數平台,利用香港風水命理學家馳名兩岸四地優勢,打造出一個「風水港」。