新世界（017）份業績報告，舊年喺英國「請咗」狄更斯出嚟，引用《雙城記》名句「這是最好的時代……」，來做主席展望嘅開場白。今年就轉去德國搵大文豪、《浮士德》作者歌德「出山」，在業績公告中引用其名句：「生命當屬生存者所有，生存的人應為改變時刻做好準備。（Life belongs to the living, and he who lives must be prepared for changes）」，指集團未來要變陣適應新挑戰喎。
大家一直好想知道，主席鄭家純咁忙，點解有時間刨咁多西方文學巨著，唔通佢「吳克儉」上身？噚日開業績會嗰陣，有記者就問純官點解會引用歌德名句，係咪對前景好擔心呢？點知純官反應好大，話「乜嘢名句呀？你再講多次，我講嘅名句？」跟手佢笑住咁𢱑一𢱑頭，個記者再講多次歌德個名，純官就：「吓？」一聲叫出嚟。