華籍小將吳嘉晉今期（3日）座騎中，包括第9場2班泥地1200米隻「加州議長」，呢匹4歲美國馬今季跑草地經常接近，但就贏唔到，轉場跑泥地隨時變身，事關此駒上季曾喺3班同程以2.75個馬位之先，輕易擊敗「嫡愛寶」贏馬，泥地性能有晒證明。

「加州議長」上仗在蔡明紹胯下跑第四，由於蔡明紹要代表香港，出戰毛里裘斯騎師賽，今期請假，加上「加州議長」負120磅，騎慣騎熟嘅郭能未必造到磅，種種巧合下就換上嘉晉仔，話唔定一拍即合。

記得嘉晉個幾星期前谷草夜賽，憑同系「加州勇將」贏出個人今季首場頭馬，今次再獲提供另一匹「加州」，仲要有2檔，嘉晉仔坦言機會難得，表明好渴望為馬主建功。