【我的置業故事】4球上車落老婆名 愛妻男：香港樓價似乎唔跌！
蘋果日報 2020/07/17 00:00
驗樓大埔海日灣II
買樓「人頭」可貴！從事金融業的黃生首次置業都好識做，人生第一層樓「寫咗老婆名」，說他是愛妻號，他不敢當，完全因為老婆有銀行職員plan，按揭利息僅1厘，月供比一般人平2,583元。去年中以400萬元買大埔白石角海日灣II開放式單位，銀碼低，一旦跌市都不太傷。沒料到落定後，美股跌逾1,000點，難道是「樓市明燈」？曾經心亂如麻，但經歷社運、疫情，不論是黃生，還是大部份的香港人都覺得「香港樓價似乎真係唔會跌咁」。
黃生婚後帶老婆回父母家住，不用租樓慳好多，慶幸沒有婆媳糾紛。跟很多香港人一樣，都被「人生必須買樓」框死。睇過不少新盤，最記得「大圍珀玥出奇地細」。二手樓由北角睇到土瓜灣，「開始睇，咁不如買層做投資，北角都唔錯喎，因為香港島啲樓價一路都感覺會好啲㗎嘛，係咪？」睇樓兩年，感覺「二手樓呎價好貴，樓齡30年、40年嗰啲都好貴，好似好唔抵。」
樓市政策下盡走位 首上車寫老婆名
大埔海日灣II去年4月推出市場，「最鍾意佢開放式單位個則，其他開放式單位無梗廚，如果有梗廚又未必有光廁。油煙，唔鍾意，廁所通風，乾淨啲。呢個則有梗廚、有光廁，四四正正，無露台，地方好見使喎，用來做二人世界，咁都幾開心，咪入飛囉！」他指，大埔白石角全部是新樓，數分鐘步行到海邊散吓步都幾開心。交通是隔涉，出入駁小巴、巴士，但希望居住人口增加，交通配套可以改善吓。
他抽中前籌，以約400萬元買入一個實用面積251方呎單位。人生第一層樓，黃生「寫咗老婆名」，「因為老婆係銀行職員，有比較優惠按揭方案，比坊間平超過一半。咁又唔會因為（咁而）俾按揭綁死，如果老婆要轉工，咪轉plan囉。有優惠咪當bonus！」他稱：「結咗婚，人生係一齊，呢一刻對大家都有好處嘅話，落佢名先，無所謂，到第二層樓先寫返我名囉。而家樓市政策下，盡量走位，無必要寫聯名。媽咪有無微言？無，好歡迎，大家都無所謂，因為一家人。」據了解，他老婆可獲低至約1厘按揭貸款，以他們借9成，分25年還款期估算，月供13,567元，比起一般人借2.5厘息計，月供平2,583元。
去年5月4日落細定，「買個陣都覺樓價高，但樓始終都要買。遇到啱又未必抽中，抽中又未必有啱嘅單位。心諗我可能買完之後就係樓價最高位。好記得，簽完約之後，美股就跌咗1,000點。嘩！好準喎，我一買，美股就跌咗1,000點喎。（感覺自己是樓市明燈？）哈哈，準係贏方面，同準係輸方面都好值錢。但我唔係炒樓，初衷都係二人世界，買咗開開心心咪得囉，股市有升有跌，同樓市又唔係直接掛鈎。呢個係一個深刻嘅記憶。」
樓始終都要買 黃生：香港樓市似乎唔跌
事後孔明講乜都得，「睇返轉頭，樓價咪去返以前一樣。樓價唔會好似以前咁一跌跌幾成，咁嘅情況唔會再出現。今次咁大個疫情，係咪跌咗幾個巴仙左右呀？而家樓價去返11月份高位啦。」他續稱：「呢層樓係踏腳石，上咗車，大架車又好，細架車又好，上咗先，有一個比較好嘅起點，如果一下子買三房會比較吃力，香港樓價似乎真係唔會跌咁，好誇張。社運又好，《港區國安法》又好，都無乜影響樓價。始終都要買嘅，睇啱心水咪買囉。」
原本計劃做二人世界，又怎料到買樓半年老婆有喜。將為人父的他笑到瞇起雙眼說：「BB好腳頭，真嘅，因為我太太有咗之後，我事業發展都好啲。好感恩。唔知點解喎，老人家係有咁嘅智慧，話BB係會帶糧食嚟。所以我覺得每樣嘢樂觀面對。如果當初知道有BB，就唔會揀呢度，因為呢度比較細。而家買咗咪買咗，住兩、三年先，到時過咗辣招，咪換大啲囉。」
-----------------------------
-----------------------------