今日首次同蘋果波神合作本欄，希望沾一沾佢嘅強勢；佢專攻英國二線聯賽，我就對法國波較有信心，巴黎聖日耳門主場對聖伊天，我揀個2:2和波冷膽，有17倍。
聖日耳門今季戰績好番好多，喺法甲仍有爭標希望外，亦向歐協盃同法足盃3線發展，而佢哋似乎對盃賽較為着緊，用人比聯賽完整；聖日耳門下周三就要主場對禾夫斯堡，進行歐協盃32強首回合賽事，但有一對前鋒賀拉奧及艾拿奧特因傷缺陣，基士文又因紀律問題被球會罰停賽，今次可大條道理留力。聖伊天無疑亦要打歐協盃，更要作客奧林比亞高斯；不過此軍由前里昂教練佩連接手，近況有好轉，連續兩仗不敗。以聖日耳門今季都開過兩次2:2波膽，今仗一於再扒冷。

巴塞隆拿肯定係近期熱門客至愛，美斯、伊度奧等入球停不了，不過近期作客就開始有啲轉勢，好似前仗作客桑坦德，亦一度落後0:1之下，險勝2:1。而且美斯、沙維、亨利等周中又要為國效力，周六回師聯賽，就要作客南部嘅貝迪斯，隨時被貝迪斯上半場偷雞領先，下半場先追得番，一於博一博半全場「主/客」，都有20倍。
英足盃賽事，再追車路士擺明係條氣唔順，上仗車仔主場對侯仔，如果唔係泰利開波2分鐘3碼「打飛機」，戰果肯定唔同，既然「大菲」已走，眾將更醒醒定定，作客屈福特我信車仔可大勝兼不失，博5:0波膽。
文：牽牛