外號雷神的莫雷拉近排公認有啲「臣臣哋」，贏馬少之又少，剛周日（3日）沙田更交白卷，表現令唔少馬迷大失所望。

這晚（6日）在谷中國際騎師賽大日子，雷神於大量外賓及各國媒體鏡頭面前，打番場身價波；佢繼頭場勝出大熱門羅富全的「銘記心中」後，第二場四班1200米隨即以同屬大熱蔡約翰馬房的「勇闖者」添食，起孖包辦第一口孖寶。「勇闖者」單Win及組合獨贏A1分別派24.5及21元。

「勇闖者」由大馬主蕭百君家族持有，上季最後四戰三亞一季，之後缺陣，今仗乃休息5個月後季內初出兼首戰谷草，從第1檔起步沿途守前列好位，直路一望空即加速脫穎而出，大勝兩馬位，姿態清脆俐落，取得服役首捷。今季甚少入馬場的雷神嫂這晚亦現身，賽後擘大口恭迎丈夫獻吻，兩人在鏡頭前互嘴，雷神可謂一洗近日頹風。

蕭百君表示「勇闖者」操練充足，臨場狀態非常勇銳，因此賽前有信心。

雷神憑一對1檔大熱馬囊括第一口孖寶，亦平了自己上季同晚頭馬數目，當時佢贏第三、六場起孖，反而輸晒騎師賽四關！

今場另一特別之處是韋達策4.7倍次熱霍利時馬房「正本雄心」輸得非常眼冤，不知何故他沿途大力扣住此駒，令馬兒彈吓彈吓，步姿非常不順，全程搶晒口，馬頭兩邊擺，結果直路墮退包尾而回。

第二場二至四名都是半冷或大冷門，分別為「指揮官」、「紅旗星將」及「駕悅」，四重彩派九萬六千幾。