由車太鉉同埋女團f(x)嘅Victoria(宋茜)主演嘅《我的新野蠻女友》將於下月喺韓國上映,噚日兩位主角都喺韓國接受訪問做宣傳,不過二人一向人緣好好,所以唔少明星都錄影片為佢哋打氣,好似近日嘅人氣王宋仲基自然即拍片為車太鉉加油。
宋仲基因為《太陽的後裔》而成為萬人迷,唔少粉絲都移情別戀轉冧宋仲基,就連唔少人妻都瘋狂。好似車太鉉噚日就上咗MBC綜藝節目《黃金漁場-RadioStar》,佢喺節目內就出賣愛妻,大爆妻子好花心,原本妻子就鍾情宋仲基嘅師弟朴寶劍,點知《太陽》爆紅後,車太鉉老婆竟然轉軚冧宋仲基,認真花心。
車太鉉爆料話:「不久前我同宋仲基喺屋企附近一齊飲酒,當時我妻子亦都有份參與。結果嗰邊就引起唔小哄動。加上我睇過妻子同朋友之間發嘅短訊,仲講你係拯救咗國家乜乜嘅《太陽》台詞,我真係好耐冇見到妻子咁快變心了,明明之前仲鍾意朴寶劍,咁快又鍾意宋仲基呢。我哋屋企個邊嘅大媽以前都係朴寶劍嘅粉絲,但好快又鍾意宋仲基,真係令人擔心。」
車太鉉喺節目上爆料話佢老婆0依家勁冧宋仲基,所以宋仲基都禮尚往來拍片為前輩車太鉉打氣,宋仲基話:「作為車太鉉嘅弟弟同後輩,睇過好多佢嘅作品,事隔咁長時間再次見到牽牛,真係非常期待。」
而f(x)其他成員包括Krystal、Amber同埋Luna,佢哋都有拍片為好姊妹打氣,Krystal話:「今次我哋宋茜姐姐出演《我的新野蠻女友》,作為同隊嘅成員非常自豪亦都好期待,希望大家多多支持電影。」Amber同Luna亦都叫大家多多支持電影。