由韓國金牌製作人羅䁐錫製作嘅tvN綜藝節目《尹食堂》，去年開播後大受歡迎，今年製作第二季，由元老成員尹汝貞、李瑞鎮、鄭有美繼續演出，韓劇《她很漂亮》男星朴敘俊亦加盟做打工仔。

《尹食堂2》今年初開播時已經高收14%收視率，而李瑞鎮喺節目開播前就承諾觀眾，如果節目收視率破15%時就會開拍第3季。隨住收視率不停升，《尹食堂2》更以15.9%收視率創下tvN綜藝節目嘅收視紀錄，令觀眾相當期待第三季。

節目噚晚播出最後一集，尹汝貞、李瑞鎮、鄭有美、朴敘俊一行四人嘅餐廳結束營業，要離開住咗近半個月嘅西班牙小島，回歸本業，大家都似乎好唔捨得，更一一向鄰居道別，而節目亦以13.3%好成績劃上句號。

至於接檔《尹食堂2》嘅新節目《森林中的小屋》，同樣由羅䁐錫製作，並邀得韓劇《Doctors》女星朴信惠及型男蘇志燮演出。《森林中的小屋》落實下月6號首播，同時公開咗首個預告，不過就得朴信惠把聲，而朴信惠自稱自己係「實驗對象A」，引起觀眾好奇。

更多韓流，喺晒《娛果》
http://fb.com/appledailyent