李八方online︱廖長江一路向西 建制「嘈到拆天」？
蘋果日報 2020/11/19 22:45
李八方online廖長江中聯辦
八方聽聞唔少建制對廖長江（前左）有不滿，但礙於佢係班長兼直通西環，費事開拖喎！資料圖片
建制派鏡頭前一字排開，由建制派「班長」廖長江帶領，左聲討、右譴責民主派場面，過去一年經常見到。八方聽聞一字陣式背後，唔少建制對廖長江有不滿，但礙於佢係班長兼直通西環，費事開拖喎！
2016年起，廖長江接替民建聯葉國謙擔任建制派「班長」，代表建制派喺鏡頭前發表聲明等。據知有建制派私下對班長滿腹牢騷，不滿佢喺建制派內部會議，只係顧住頒佈西環「聖旨」，引述廖最常掛喺口邊嘅係「西環話……西環叫我哋……西環想……」，又話對方離地，有次同傳媒嘅公開會面，不知道「自由風自由Phone 」為何物。
睇返上年立法會審議國歌法，泛民拉布或致流會時，冇熄咪嘅廖長江就被錄得一句，一旦流會「西環實嘈到拆天」，可見佢心繫祖國，一路向西。
有建制派就話，西環永遠向建制派畀「最硬、最左」嘅指令，廖長江永遠照單全收唔抗命，冇提出反建議，搞到要面對直選嘅建制派都要執行最硬指令，覺得可能因為廖嚟自「全港最左商界」嘅中華總商會，又係功能組別，所以冇興趣幫建制派向西環討價還價，同前任面對過區會選舉洗禮嘅班長葉國謙好唔同喎。
查實做得建制派，接旨做嘢都係預咗，食得鹹魚抵得渴噃！
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！