【幫嘉穎o氹女友？】陳凱琳聽日26歲生日 孖溫家偉撳電話傾密偈
蘋果日報 2017/06/22 18:37
日本料理陳凱琳26歲生日
聽日就26歲生日嘅陳凱琳，正日有冇假放就未知喇，但生日之前仲要開工。
今日下午約5點幾，陳凱琳同「大隻仔」溫家偉、趙希洛仲有陳國峰，4個人一齊喺銅鑼灣拍飲食節目，4人先喺一間高級日本料理拍攝，之後就走落街頭拍外景。
心情靚爆嘅陳凱琳邊行邊同大隻仔傾偈，兩個人傾到雞啄唔斷，一時攞住部電話一路睇一路笑，一時又攞住把遮玩，期間有途人見到佢哋拍嘢就攞手機影相，仲有人讚陳凱琳真人靚過上鏡，而佢哋拍咗十幾分鐘就返番上日本料理店喇！
講到生日有冇活動？陳凱琳之後回覆傳媒時話：「下晝要出席活動，但男友（鄭嘉穎）會喺大陸趕返嚟同我慶祝。」
採訪、攝影：徐錦池
陳凱琳同溫家偉、趙希洛、陳國峰喺銅鑼灣拍飲食節目。
周街揈遮。
天氣熱，一個露膊，一個露腰。
唔使埋位嘅時候，溫家偉同陳凱琳喺咁玩電話，仲笑得好開心。