人到中年不少人會「滑啞」接受命運原地踏步，火火與KB兩位同年同月只相差8日出世的中佬，卻沒有將心中創意撲熄，反而透露日常廢噏去啟發靈感組成中佬男子組合「雙龍出海」，並決定透過搲人幫手以零資金去開演唱會。兩人各出奇謀去搲幫手背後，造就一場機會，讓一班苦無機會發揮音樂、創作、設計才華的人大展拳腳，兩位中佬在籌備中每當聽到一句又一句的感激說話，也為之動容。

掛住「冇大台，靠香港人」口號，李家榮（火火）與李健宏（KB）9月時組成名為「雙龍出海」中佬男子組合，更於網上專頁寫上「可能係第一隊萬人幫拖捧紅嘅中佬男子組合」。計劃以實驗性質進行，看看能否透過搲人幫手而成功於明年舉行首個演唱會。火火與KB日前搲到去葵涌一間Band房，希望搲到Band友能義助為演唱會彈奏。面對住眼前Band友們，火火與KB先跟大家閒談了解背景，繼而邀請各位即席彈奏，KB露出驚訝表情問：「你哋咁勁，做乜要嚟呢度？」火火忍不住附和：「我仲以為今日嚟嗰啲係流，原來位位都係大師，令我原本諗住自己可以柴娃娃咁玩嘅空間都冇。」聽到興起的KB即場要求大家伴奏他唱《海闊天空》，豈料他唱出「今天我 寒夜裏看雪飄過」便急剎叫停，令Band友們爆笑起來。

定下目標明年開騷，火火指對於「雙龍出海」絕對是大挑戰，他說：「一定冇大台，冇人畀任何錢，甚至乎硬件、軟件與Money都唔會有，全部都靠我哋搲，今日搲樂隊，之後Dancer、搣飛、First Aid，所有要有都要搲。」KB指甚至平日宣傳拍攝工作，都是搲回來的義務團隊。當初構思時，他們不知道社會變成怎樣，只單純覺得香港這幾年來都充斥不快。「我哋兩個都係微不足道嘅小市民，如果我哋呢兩個咁嘅人靠搲都可以搲到演唱會，香港仲有咩係唔得，呢個係我哋想法。」

KB透露當初是閒聊間問火火：「你臨死之前有咩未做過，佢話未唱過歌，我話不如搵隊組合玩吓啦。」火火笑住話：「我有兩樣嘢想做而未做，一個係成世都做唔到嘅開演唱會，點知講咗出嚟就話做。第二樣就係背住老婆去滾，呢樣係好想做，但最唔敢做，做唔到嘅，你係咪？」KB也承認自己沒能力做到。籌備至今兩個多月，KB非常震驚原來透過網絡真的能夠找到人幫手，他說：「我哋訂下規例唔可以搵身邊朋友幫手，初時以為好辛苦，死啦，有冇人會理我哋，但係我覺得幾順利。」

火火反而被不少情景感動，他說：「有位幫我哋作主題曲嘅女仔，無端端講到喊，我話做乜？佢話『呢個時代，其實我哋好鍾意玩音樂，但我唔知點，冇機會畀人睇到、聽到，寄咗好多Demo出去都石沉大海，但我估唔到有機會可以展示到首歌出嚟』。」他料不到原來過程中竟然幫到人，因為依他們人脈關係，平時做首歌放上網讓人留意根本沒難度，但原來這種小小的舉動，對好多人來說是渴求已久的夢想，火火續說：「有人可以行出嚟表演，有人首歌可以出到嚟，有人設計出到嚟，就算用喺兩條蛋散身上，佢都感動到喊，開始覺得呢件事，由初初坐喺街頭廢噏，諗住玩吓，原來佢有第二啲意義喺度。」

受制於近日香港社會氣氛，他們承認籌備進度比預期之中慢，曾擔心每次會面延期會令有心幫手的人越來越少時，怎料得到結論是大家仍然願意積極參與，令他們喜出望外。火火自言此刻心情是一半緊張，見到參與者的熱血，令他覺得是否要努力練唱歌，但換個角度去想，自己唱不好也是應該，因為是玩票性質與眾同樂，心情又輕鬆過來。KB覺得整個計劃意義是希望聯繫到不同的人去做一件事，他說：「上到台，佢哋先係主角，我哋只係配菜。」

採訪：馬建華
攝影：林賓尼
拍片：廖達燊

-----------------------------
蝙蝠俠誕生80周年
點擊即睇85頁經典大回顧
-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇