90年代人氣日劇《偶像媽咪》女星後藤久美子，當年以日本國民美少女姿態走紅亞洲，不過佢喺21年前毅然放棄事業，為一級方程式車手阿里斯（Jean Alesi）嫁往法國，並為丈夫誕下兩子一女，多年來專心照顧家庭。

現年43歲嘅後藤久美子息影多年，其18歲乖仔Giuliano已繼承父業做車手，而10歲細仔John就喺瑞士讀緊書。至於20歲長女Elena亦遺傳媽媽良好基因，決定加入藝能界，仲與媽咪昔日所屬嘅Oscar Promotion事務所簽約，將於明年喺日本正式展開活動，後藤久美子為助囡囡入行，佢哋仲母女檔成為今期雜誌《Richesse》封面人物。

Elena今年11月喺倫敦嘅電影學校畢業後，今年年底就會返日本預備明年入行，Elena精通法文、英文、日文、意大利文、德文同俄文六種語言，佢話自小夢想好似媽咪咁當演員，對模特兒同女優工作有興趣，日後都想嘗試當導演。

今次《Richesse》係專程飛到意大利拍攝，係一個同著名品牌Bulgari嘅合作企劃，後藤久美子母女戴上逾1億日圓，即逾700萬港元嘅珠寶同名錶受訪，首次當Model嘅Elena就話同媽咪一齊影相好開心。