全國政協副主席、前特首梁振英早排搞咗個篤灰網，利誘人篤灰提供示威者就有錢收，689噚日接受中新社訪問，篤灰網會搞第二波行動，就係要查反送中背後資金同物資流向，班網民一見到即刻異常興奮，個個話要篤灰，「舉報」資金來源，咁啲錢係邊個畀？網民異口同聲話，其中一個「金主」，咪689個愛將、財政司司長陳茂波！

稱市民踴躍提供線索

689喺中新社個訪問係咁認叻，話個篤灰網效果唔錯，聲稱自己冇積極募捐，但反應踴躍，仲有朋友要參加，但收到幾多捐款冇交代，有冇派過花紅出去亦冇數，只係話有好多市民提供線索同訊息，又話就快開展第二波行動，佢希望徵集反送中運動背後資金同物資流訊息，話社會上有說法，指好多年輕人收到超市購物券同八達通。

用政府4,000蚊買gear

網民見689又話查反送中資金來源，立即恥笑佢2013年底講好咗喺適當時候提出具體證據，證明當時反佔中背後有外國勢力。結果就快2020年，佢自己落埋台，可能連佢繼任人林鄭都落台嗰陣，啲具體證據仲未公開。𠵱家又話查反送中？真係2047都未必有結果。

另一班網民就話要篤灰，舉報其中一個幕後金主係陳茂波，因為佢哋個個拎晒波波派嘅4,000蚊去買裝備，又或「助養」衝衝子，又有人話收咗政府4,000蚊，咪有錢出嚟示威，仲有人話冇政府畀4,000蚊，邊有錢買gear？所以要追究金主，不如先叫差人搵波波入新屋嶺傾48個鐘先喇！

李八方