孫慧雪入行10年，知名度同曝光機會一樣唔高，但其實一直以來都有唔少觀眾留意佢，直至今年推出咗第一本寫真集，終於人氣勁升。

雪雪曾就讀衛理中學，城大語文系畢業，做過parttimemodel，後投考無綫第20期藝員訓練班，06年畢業後第一個騷就係《美女廚房》助手「飯」，同年喺大台世界盃節目做「世界妹」，負責畀貼士。阿雪亦喺《志雲飯局》做助手，之後仲同拍檔寧進傳過緋聞。不得不提當然仲有《一擲千金》啦。

阿雪第一套大台劇係《刑事情報科》，只係演一個秘書仔，咁多年嚟參演過超過50套劇集，不過都係做閒角居多，甚少有女配角機會。講得出名嘅角色一隻手都數得晒，好似《師父·明白了》入面演「小卿」、《衝上雲霄II》入面做空姐「單冬娜」咁。講到最重戲份嘅角色，都係啱啱先大結局嘅《純熟意外》裏面嘅楊言愛。佢仲經常拍處境劇，同一個劇可以「分階段」演唔同角色，根據維基資料，單係喺《同事三分親》，雪雪已經分別演過名店店員（第33集）、婚紗店店員（第37集）、記者（第61-66、362集）、途人（第137集）、李可兒（第264集）、六合彩女主播（第323集）同新聞報道員（第357集）。

又如《愛‧回家》，根據維基，雪雪演過Apple（第22集）、Bonnie（第109集）、白雪（第171-172集）、Coffee（第254集）、化妝師（第264集）、Sharon（第311集）同Yam（第527集）。