冠軍科技（092）現價係NAV嘅一折唔夠，博翻半番，有得諗。冠軍NAV 1.22元，現價0.105元，貼住金融海嘯價，NAV折讓高達91%，即係話，冠軍現價得NAV一折左右，殘到爆。勻真啲減咗集團資產當中嘅開發成本39億銀，每股NAV得番0.58元。就算係咁，冠軍嘅NAV折讓仲係高達81%，離晒譜。又冠軍2012年度（6月底止）純利6248萬銀，增長10%，家陣PE得10倍，已經唔係貴。而喺年度裏面，因應經營環境風險唔多盞，冠軍為求隱陣，確認一項系統網絡按金及開發減值1億銀。唔計呢項減值，每股純利起個孖有凸，PE得4倍左右。呢轉買冠軍，博翻半番到0.16元，折讓仍然高達86%，實情仲係好低殘。

再生能源獲扶持

中國再生能源（987）2012年半年度純利增長近5倍，到2668萬銀。溢利基礎細，冇乜意思，但業績冇問題，安全過渡。而最吸引係，集團家陣NAV折讓高達73%，加埋環保電力又係國策，阿爺久唔久又滲啲行業扶持措施，有得諗吓。吼實0.20元橫行底兜轉，短打博升20%到0.24元，未有耐上到NAV 0.77元。錢雋