雖然球星如雲，但皇家馬德里季初表現依然不濟，惟有再班兵將實力進一步加強，反正有錢嘛。呢排就傳會收購阿根廷球會河床嘅中場馬斯查蘭奴，佢喺皇馬嘅同胞蘇拉利，就未見因為又多個人爭位而唔開心，反而大表歡迎！
蘇拉利呢幾年喺皇馬嘅身份可謂球星「替身」，出場機會冇乜，點解重可以咁大方？原來馬斯查蘭奴十三歲時進入當地足球學校，之後再轉會河床，合約上訂明以後馬斯查蘭奴再轉會，間足球學校可以獲得三成轉會費；咁啱間足球學校嘅老細，就係蘇拉利老竇同佢啲世叔伯，所以呢次轉會成事，蘇拉利屋企人亦可以賺一筆，難怪佢重可以咁大方啦。

國內傳媒籲港隊鬆章國足求人不如求己
中國前晚輸畀科特威，雖同科隊同分但得失球少兩球，隨時係世盃外圍賽出局；要下場對香港贏大大鑊，就可出線次階段外圍賽，故中國嘅《東方體育日報》叫香港鬆章畀中國。雖然中港一家親，不過國際足協提倡公平競技，中國因黑哨問題形象好差，我求大俠絕對唔讚成咁做。

管埋隊友波衫長短雲格畀韋拉打骰
大部份隊長都冇實際權力，但韋拉就唔同，冇阿仙奴球員可以唔聽佢話。佢話阿仙奴領隊雲格畀佢喺隊度話晒事，所以佢每句話都好有影響性；如果隊友想着短袖衫比賽，若然佢覺得凍想着長袖衫，其他人都要聽佢。好彩韋拉喺冬天都會着長袖衫比賽，唔係阿仙奴班球員就慘囉！