個市跌完又跌，真係好容易令人無乜戰意，加上世界盃決賽周，散子雖然平時唔睇波，四年一次都湊吓熱鬧，始終唔少炒股Whatsapp group，已經改為24小時運作，日頭炒股夜晚賭波，又或者炒炒吓股，又估吓波咁，唔睇吓波真係好容易out咗都唔知。

雖然近排賭波好過炒股，但話晒本頁係財經唔係波經，點都要講吓股份先至夠實際，港股今日同人民幣滙價一齊向下滾，恒指見今年低位，個勢似乎唔多好，不如安安樂樂睇完世界盃先再部署。

至於首隻同股不同權嘅小米（1810）終於都招股，唔少專欄作者都寫過，所以散子試吓用其他角度去分析，小米同其他重磅新股一樣有重量級嘅投資者，傳有首富李嘉誠、馬化騰及馬雲入股，陣容好似好鼎盛，不過，我哋不妨睇吓呢幾位仁兄近期嘅新股戰跡，李嘉誠隻雷蛇（1337）跌咗五成；騰訊（700）隻易鑫（2858）亦唔見咗56%，佢啲親生仔似乎信得過多啲。

另一個角度睇，香港上市嘅嘢，股價好嘅，通常對普羅大眾都唔係太好嘅，你睇吓某大發展商嘅樓；某鐵路公司，基本上畀人鬧得越大聲，股價升得越勁，大家可以自行衡量一下，港人對小米產品嘅熱情。如果咁都未說服到米粉嘅，散子都要加返句，小注抽吓怡吓情就好。

散子

全球樓行 Dream House零距離
https://hk.feature.appledaily.com/overseasproperty