阿仙奴禮拜二歐聯16強次回合，主場以1:5輸畀拜仁慕尼黑，兩回合輸夠2:10出局。槍迷真係一片愁雲慘霧，鬧爆領隊雲格，但睇番近幾季嘅成績，槍迷就唔使咁灰嘅，因為往往喺歐聯出局之後，阿仙奴喺聯賽嘅成績都會好轉，保住英超前四名。

先以上季為例，當阿仙奴喺歐聯16強被巴塞隆拿踢出局之後，聯賽兩連勝，加埋剩番嘅九場英超都未輸過，以五勝四和嘅不敗戰績殺到季尾，超越死對頭熱刺，拎到聯賽亞軍。14/15球季，當阿仙奴喺16強被摩納哥淘汰後，返到英超連贏紐卡素、利物浦同般尼，聯賽三連勝強勢反彈；喺歐聯出局後嘅九場聯賽，阿仙奴取得五勝三和一負，成績都唔錯。

13/14球季，阿仙奴被拜仁踢出歐聯後，返到聯賽，即刻作客贏咗北倫敦宿敵熱刺1:0。12/13球季，阿仙奴又係被拜仁踢出局，之後就勁嘞，聯賽四連勝，剩番嘅10場英超取得八勝兩和，走勢勁到得人驚！11/12球季，阿仙奴又喺歐聯16強被AC米蘭踢出局，之後嘅聯賽亦連贏三場。

雖然阿仙奴家陣歐聯byebye，聯賽又跌到去第五位，但相信往績的話，兵工廠會喺嚟緊嘅英超爆seed，順利保住前四名。