港珠澳大橋上月通車，昨經歷通車後第二個周日，大批內地旅客趁假日來港觀光購物，由於往來大橋的B6巴士站鄰近東涌地鐵站，間接帶動東涌人流暢旺，商舖超市擠滿旅客搶購日常用品，食肆亦逼爆「搵食兵團」，惟部份東涌居民大呻人龍處處，對他們反而造成不便，其望政府加開多些路線疏導人流，或將巴士站移位，與區內居民乘搭的巴士相距較遠位置。

今日東涌旅客數量雖然明顯較昨日大減，但隨處仍可見到旅客大排長龍的場面，市面亦見有不少旅客坐在路邊休息。

抱着1歲幼女的東涌居民何女士大呻：「東涌多咗好多人，特別街市、超市好多人排晒長龍，大橋開咗之後，尤其星期六、日特別犀利，覺得好唔方便，驚物價貴咗。」她指商舖現時賣貨的種類傾向迎合自由行顧客，「我見到多咗禮盒裝，另外好明顯係買奶粉，佢哋（旅客）一大堆一大堆咁買，揀嘢多咗人，排隊多咗長龍好唔方便，比平時多等咗幾個字（數十分鐘）至半個鐘。」

何女士又指現時B6巴士站人流多時塞住通道，與東涌居民乘38號路線巴士往來逸東邨的巴士站相近，「旅行團係度集合上落，就好唔方便，我哋行過都要左閃右避，擔心撞倒小朋友。」她建議B6巴士站可轉位置，轉到以前的舊巴士站上落客。

她坦言大橋開通，對區內居民有得有失，「呢度去澳門時間短咗，作為短線娛樂係OK，但多咗人流令居民生活、交通冇咁方便。」

逢假期有大批內地客拖篋到東涌商舖掃貨，搶購奶粉，有藥房職員透露「有貨賣到缺晒貨，依家忙住補貨」，而眼見大型連鎖店萬寧、屈臣氏等，亦有新貨搬上架，暫時未見有貨物供應不足情況。

另一名居民李太坦言東涌人流多咗，「我唔係好開心，我冇乜得益，我唔係做生意，食肆、藥房咪開心囉，我反而擔心抬高咗物價。」她又指巴士站大排長龍阻礙居民出入，最好搬去360嗰邊，或者搵個地方畀佢哋等。」她建議政府要限制每日到港團的數目，「唔好畀咁多人入嚟，依家冇限。」

而搬入東涌數個月的Miki，則指大橋開通後，東涌區內明顯人流較前多，「搭車見到有遊客拖住篋，以前出入都係街坊，依家係拖行李的國內遊客。」她以前住將軍澳區，「就係唔想好似以前咁逼先搬嚟東涌，想空間大啲，點知依家越嚟越多人，真係唔想再咁多人啦！」

昨日往來港珠澳大橋的B6的巴士站，排滿長長人龍，一度超過500人候車，今日中午所見，候車乘客約30至40人，而且很快疏導，吳先生指排隊僅5分鐘便上車，由屯門過來東涌搭巴士，純粹是遊覽港珠澳大橋，至於去珠海還是澳門，則笑言「隨遇而安，冇乜所謂」。

不少市民今早亦致電電台節目訴苦。到東涌行山的吳先生表示，昨日甫到達東涌已發現「中咗招」，他形容一出閘已見到「人山人海，唔似香港，膠樽一地都係」，他估計是遊客上車時獲派每人一樽水，批評旅議會主席黃進達「對唔對得住香港人」，直言「見到香港咁樣好心痛。」；東涌居民溫先生指，昨日有大量戴上橙色帽的旅客，人龍阻擋了居民。

有東涌中學生亦表示，今午到餐廳用膳需要等位15至20分鐘，導致返學遲到，認為人流已超出東涌可接受範圍。

你敢爆，我敢獎！ 立即WhatsApp《蘋果》24小時爆相爆片熱線 或致電：63836568