繼第七場由落飛大熱「活力小駒」勝出後，第八場二班1400米再有「旅遊仁義」大熱掄元，單Win派24.5元為全日暫時最熱頭馬，組合獨贏開A1派16元正，亦係這天暫時最低派彩。
由英籍練馬師高伯新訓練的「旅遊仁義」今季大熟大勇，對上三仗全由韋達操刀取兩冠一殿，呢鋪休後初出因磅位太輕益咗史卓豐，韋達同場冇馬跑，結果佢眼白白睇住呢匹舊相好以凌厲後勁取得三捷，此駒亦因而成為「旅遊」系馬季內最突出成員。這天跑到第八場為止，一半賽事由11號馬勝出，包括「拖板王」、「新界福星」、「甜統」及「旅遊仁義」。
「旅遊仁義」馬主仁義團體成員黃進德、黃進達的父親康泰旅行社創辦人黃士心，這天冒住寒風冷雨拉隊入場為愛駒打氣，結果人馬都冇令佢失望，賽後廿幾三十人齊影頭馬相，場面好熱鬧。
高伯新同史卓豐分別祖籍英國同南非，天南地北卻在香港擦出火花，早前已曾合作勝出冷門「金龍」，這天再以「旅遊仁義」建功。高伯新近期枕住有高班馬離巢，包括「旅遊」系的「旅遊首席」同「旅遊大使」離隊他投，高廐養馬量降至43匹，今場贏馬總算振一振軍心。
今場二至四名有冷有熱，順序為四日內跑完谷草再戰田草的方廐「天合」、蘇廐「騰龍超影」及時廐「比卡超」，四重彩派二萬九千幾。