今年升呢做媽咪嘅楊愛瑾（Miki），今晚同老公郭永淳拍拖到場，不過郭永淳顯得好怕醜，Miki笑話老公平時好少陪佢出現，因為今晚好多朋友嚟到，所以至破例，佢仲踢爆老公影相時好唔自然：「佢不停拍我後面，應該係緊張，唔習慣見咁多鏡頭。」Miki提到囝囝已經5個月大，佢大讚BB好得意，好鍾意音樂：「因為有次約側田食飯，帶埋BB去，側田帶埋結他出嚟，一彈結他佢就一直笑，仲用手打拍子，嗰時得3個月大，遲啲側田開騷，可能會帶埋佢去後台。而我同老公就好期待，佢會叫爸爸定媽媽先。」

Miki老爺嘅弟婦泰萍早前不幸離世，Miki話：「身後事都交晒俾家人，日子已經定咗，詳情就唔方便講，平時好少機會接觸，見過一、兩次，通常見佢啲仔女多，印象中佢好靚、好好人，見親都一大班親戚，叔叔就暫時未有機會見到面，相信佢OK嘅。」

另外，同場嘅李玟（CoCo）就話正忙緊綵排演唱會，仲話自己每日都會做兩個半鐘gym去keep fit，保持最佳狀態，CoCo話：「老公盡量每場都會嚟睇，仲會場場都送花，好sweet。」嘉賓就係孫燕姿，巡迴會搞到明年，佢話希望可以申請到紅館個檔期。