鄭秀文（Sammi）今日去到銅鑼灣時代廣場，出席「米奇90周年展覽」開幕活動。Sammi話自己好有童心，所以大會邀請佢出席，Sammi話：「米奇老鼠好有活力，俾到人好多希望。」問Sammi會否喺迪士尼樂園補辦婚禮，佢話：「暫時冇呢個考慮，喺迪士尼搞婚禮係一個美好回憶，因為好多新娘都鍾意米奇老鼠。」Sammi被笑指是否因為鍾意「老鼠安」（許志安花名）而獲邀請，Sammi回應：「唔關事，因為自己有童心，而且今年係米奇90周年。」被問到屋企隻老鼠靚啲，定係米奇老鼠靚啲，Sammi笑言：「梗係呢隻靚仔啲，同埋佢俾到希望人，見到佢令人好開心。」

Sammi因為工作關係，所以今朝5點已經起身做運動，佢話：「平時有一個早起嘅習慣，如果5點需要化妝，3點就會起身，雖然係辛苦，但係自己講咗要做就會堅持，係自己選擇嘅生活。」

香港市民飽受超級颱風山竹侵襲影響生活，Sammi話打風當日自己喺屋企，佢話：「屋企露台有鐵閘欄住，自己一路喺屋企留意新聞，覺得香港好多人好慘，損失好大，甚至受傷，見到海面好多垃圾膠樽，經過今次令大家提高環保意識，睇到大家互愛精神，但係打風真係好可怕，打風翌日自己都要做嘢，普通市民慘啲，我坐公司交通工具，都遇到好多塌樹，有關當局都不停清理。」

精選娛聞，喺晒《娛果》
http://fb.com/appledailyent