金管局助理總裁(金融基建)李建英(Esmond)出名風趣幽默，佢今年「登六」，8月退休，問佢之後做乜，佢竟然話要抽iBond，賣花讚花香到咁樣樣。

李建英噚日代表金管局公佈新一批iBond詳情，前幾年通脹高，iBond回報唔錯，可惜都唔關Esmond事，事關佢一日喺金管局返工，都有利益衝突，連家人都唔可以抽iBond。

所以佢噚日好開心咁話，退休之後一定會去抽iBond，大家明年預埋佢，唔使擔心認購反應唔好。

不過家陣通脹越來越低，明年分分鐘冇新iBond推出，Esmond即刻展露幽默本色，笑笑口話「個天唔會咁整蠱我，唔會等我行遲半步就走寶。」

其實就算冇iBond都唔緊要，政府考慮為長者推「銀色債券」（SilverBond），Esmond過多幾年夠資格都可以參與喇。