煲呔上周六率領三司十二局鬼祟「超錯」……呀唔係，應該係起錨落區，搞到一鑊粥，成為政治笑話。有網民仲發現，當日有個「市民」喺金鐘收完唐唐派嘅傳單，轉個身就喺沙田幫特首護航開路，質疑政府係咪搵人做媒扮市民接傳單。
根據網民擺上網站YouTube嘅片段（ http://www.youtube.com/watch?v=DWQi4ItrKcw），當日無記新聞影到呢位仁兄一早企喺巴士站，唐唐嚟到派傳單，呢位「市民」就雙手接過傳單。鏡頭一轉，去到沙田，咦！點解又見到呢位「市民」，但佢今次企喺煲呔附近，沿途護送，仲間唔中東張西望，成個便衣G4咁嘅款。

特首辦話冇安排

有網民質疑政府係咪搵警方便衣人員扮市民收傳單。八方向來唔會是是但但，於是向特首辦求證，發言人話冇安排人員去接傳單。
其實呢單嘢好易拆得掂，如果嗰位仁兄真係便衣，政府大可以話唐唐當時唔知對方係便衣人員，一時手快塞咗張傳單畀佢；如果佢係「市民」，亦可以話個市民好鍾意煲呔，忍唔住沿途保護。
綜觀成場超錯騷，好明顯係娛樂活動，長毛噚日就喺立法會質問林D9，點解食環署唔要求特區政府攞咗娛樂牌照先表演？仲應該沒收埋佢哋嘅起錨展品，減少製造垃圾。林D9就堅稱佢哋只係派傳單，冇展示過任何嘢。

市民斥做騷荒謬

咁林D9又錯唔晒喎，佢哋唔只冇展示過任何嘢，仲唔知自己做乜嘢。當日當面叫鬍鬚曾解釋呢個政改方案點樣好過05年嗰個嘅戚先生，噚日打電話上港台節目《千禧年代》，批評鬍鬚曾十問九唔應，仲態度差劣咁話多謝佢夠大聲，成件事好荒謬，令人覺得鬍鬚曾除咗不知所措，根本冇諗過答市民問題。唔少聽眾亦話，當日接過傳單後想向官員問多兩句，但統統俾啲高官跟班推開。做場騷辣㷫咁多市民，似乎將句口號改做「起火」仲貼切。

mailto:[email protected]