現年53歲日本男星堤真一喺2013年同細佢16年嘅圈外人太太結婚，兩人育有一個三歲囡囡，原來堤真一已經秘密再做老竇，太太喺今年春天再為佢誕下二女，不過佢一直未有向外公開喜訊。

據新一期雜誌《女性自身》報道，堤真一日前被拍到駕車送女兒到著名私立幼稚園返學，當時見到佢抱住囡囡，而太太就湊住一個BB。據知情人士透露，堤真一第二個小朋友喺今年春天出世，係囡囡嚟嘅，而佢為迎接小生命已經搬離原本住嘅豪宅。

雜誌採訪當日見到堤真一夫婦送咗大女返學後，就去到附近嘅百貨公司購買BB用品，其間堤真一不時撩囡囡、用溫柔語氣同囡囡講嘢。雜誌記者翌日再去到堤真一寓所採訪，當日佢哋夫婦兩人就去咗超市買嘢，當記者恭喜佢再做爸爸時，堤真一禮貌講咗句:「多謝。」但就未有進一步回應。

據指堤真一去年曾辭演大河劇《西鄉殿》，估計太太喺去年秋天發現有喜，佢為照顧妻女決定辭演拍攝長達一年、兼要長期要喺九州開工嘅《西鄉殿》演出，而現時堤真一就忙於電影、劇集同舞台劇工作，努力搵奶粉錢。