黃店唔只可以出錢撐，仲可以出力撐撐撐。左報近期狙擊油尖旺區議會副主席、公民黨余德寶喺復活節為藝人吳日言喺旺角站嘅黃店做義工賣飯團係瀆職，真係唔知好嬲定好笑，事關經民聯梁美芬咪一樣撐楊明，又唔見左報開炮？余德寶今日就再度出擊，拍住該黨立法會議員譚文豪（Jeremy）再為吳日言做義工賣飯團，個零鐘頭已成功為黃店極速「清架」。德寶話呀，有街坊話因為見到佢俾左報同民建聯狙擊而特登嚟入貨，似乎黃色經濟圈至今生生不息，左報同民建聯嘅抹黑都「居功不少」。

武漢肺炎影響下，八方今日現場所見，旺角站出口明顯少咗好多人，但無減Jeremy同德寶sell飯團嘅熱情。佢哋除咗摩打口咁不停向途經巿民講「今日食咗飯團未啊？」、「買個飯團試吓吖！」，更喺街上舉牌呼籲巿民幫襯，工黨前代主席趙仕信都有到場支持。

短短一粒鐘，兩人已賣出近50個飯團，當中除咗有Jeremy嘅女fans突登由筲箕灣過海嚟買飯團，再同Jeremy嚟個selfie留念，亦有一家三口嘅巿民一口氣買成10幾個飯團，令店舖要極速補貨；今午特登到場探班兼入貨嘅楊岳橋就只能改買其他零食力撐嘞。

余德寶話今次做義工係因為睇唔過眼警方近日不斷針對黃店，希望為黃店出一分力。左報早前用「神邏輯」質疑議員嘅薪水唔屬於議員，Jeremy今日就話，今日佢放假嘅時間，一定係屬於自己嘅，所以做義工一定無問題，更話好期待揸佢最愛嘅電單車，為黃店送外賣，希望嚟緊可以為黃色經濟圈再出一分力喎。

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》讀果 上架
-----------------------------
App內1-Click訂閱《蘋果動新聞》
按此了解更多