影壇巨星珍芳達（Jane Fonda）同羅拔烈福（Robert Redford），雙雙於威尼斯電影節獲頒金獅終身成就獎，而其再度合作嘅新片《Our Souls At Night》更會於威尼斯電影節作全球首映並參與非競賽單元。大會表示二人於獨立電影發展有重大貢獻，更高度讚揚珍芳達有才華，羅拔烈福對演藝同環保都有重大成就。

《Our Souls At Night》由Ritesh Batra執導，並由Netflix投資製作。Netflix電影早排於康城電影節搞到滿城風雨又惹來杯葛，但威尼斯電影節似乎就開放得多。電影講珍芳達老公已經過身，羅拔烈福都一樣早已喪妻，幾十年嚟佢哋係鄰居但冇乜接觸，但珍芳達有一日突然走去搵羅拔烈福，展開故事。佢地兩個上次合作已經係1979年嘅《電騎士》（The Electric Horseman），今次事隔38年再度合作當然令人期待。電影將會於下年於Netflix上架，而第74屆威尼斯電影節就會於8月30號至9月9號舉行，二人將會於9月1號出席頒獎禮接受殊榮。