以破球會紀錄由多蒙特加盟巴塞隆拿嘅翼鋒奧士文尼迪比利，上場對基達菲賣弄腳法玩出禍，大腿肌肉受傷要休息3至4個月，巴塞宜家可以抱怨緊，點解迪比利唔傷耐啲，事關如果傷夠5個半月，可以根據緊急條款簽入1名西甲兵。

據西班牙傳媒報導，西班牙足協有緊急簽人條例，如果1名球員嚴重受傷5個半月或以上，所屬球會可以從西班牙足協轄下聯賽中，收購1名球員應急，但宜家迪比利傷得唔夠耐，所以唔可以用呢個條款。要增兵都唔係冇可能，巴塞仍然可以轉會市場重開前簽入1名自由身球員，不過只可以踢西甲，唔可以踢歐聯，不過宜家都自冇班落，球員真係叻極都有限啦。現實啲講，巴塞要靠迪路菲奧、丹尼斯蘇亞雷斯頂住，等迪比利復出。