【MLB】處子擊球即揮安打 台灣新星完美開局!
台灣棒球職棒MLB美國職棒大聯盟林子偉波士頓紅襪
身為亞洲棒球強國,台灣唔少球手都以登陸最高殿堂美國職棒大聯盟(MLB)為夢想,23歲嘅林子偉(Tzu-Wei Lin)經歷5年奮鬥,終於迎來完美開局!周一MLB常規賽,備受傷兵困擾嘅波士頓紅襪喺2A小聯盟提拔台灣三壘手林子偉,繼上周六後備入替後首次正選上陣,第2局面對明尼蘇達雙城投手貝利奧斯(Jose Berrios)首3記投球未有揮棒形成一好兩壞,到第4球首次擊球就擊出一壘安打,雖然最終未能得分,其後兩次上場亦先後遭三振同刺殺,依然係一個好開始!最終紅襪亦以4:1擊敗明尼蘇達雙城。
其實林子偉早喺2010年嶄露頭角,贏得世青賽最有價值球員,並於2012年同紅襪簽約,5年來一直喺小聯盟磨煉自己,直到近期乘紅襪內野手魯迪治(Josh Ruledge)受傷而獲得提拔,成為第13位晉身MLB嘅台灣球手,佢亦成功把握機會交出精采演出,話唔定好表現陸續有來!
↓林子偉MLB處子安打↓
http://bit.ly/2thrMiM