【尋所羅門王】曾志豪「過檔」商台爆《頭條新聞》慘況 盼觀眾主持公道
蘋果日報 2020/03/13 15:10
頭條新聞曾志豪
港台電視節目《頭條新聞》一直以幽默方式諷刺時弊，但近日卻屢遭投訴，甚至觸動警務處長鄧炳強的神經出信投訴，連帶大台亦拒絕再播映港台節目。
《頭條新聞》忽然成為全港人聚焦話題，港台「鄰居」兼競爭對手的商台，在節目《903獨立調查委員》中，便特別訪問《頭條新聞》的主持曾志豪。日前節目出街，DJ阿檸問曾志豪單以《頭條新聞》計，所受到的限制和壓迫有多少時，曾志豪以著名《聖經》故事《所羅門的審判》來作比喻，他說：「如果你話用量化呢，我就諗起所羅門王，即係有兩個阿媽都認自己係個小朋友嘅親生母親，嗰個古仔裏面，所羅門王就好有智慧咁話『掹啦，你哋如果邊個可以掹到嘅，嗰個BB就係你嘅』咁樣，錫住BB嗰個梗係放咗手啦！但係好不幸，呢個古仔喺我哋身上就係應驗咗一半啫，就係而家我哋真係有好多人掹緊我哋呢個BB，但係冇任何人願意放手。即係有人會覺得，可能應該要更換一啲主持呀，有人可能覺得連處長都要更換呀，可能有人會覺得成個港台（嘅）錢都應該要去檢討呀、要去cut budget，咁你睇吓嗰度有幾多隻手、有幾多隻腳全部就掹緊香港電台呢個一個BB，冇人會放手，而家個壓力就係睇吓我哋係咪《One Piece》嗰個Luffy啦，睇吓我哋係咪可以橡皮人咁樣越拉越長，定係終有一日會拉斷嘅。」似乎在感嘆現時圍繞在港台身邊的團體，沒有一個真心愛錫港台。
曾志豪更坦言，被「掹」都並非最慘，而是沒有主持公道的話事人，他續說：「最慘嘅係唔單止冇人肯放手，而係我哋都好似見唔到會有一個充滿智慧嘅所羅門王企喺度，會做一個比較公正啲嘅判斷，可以等呢個問題會容易啲解決，就喺度拉扯當中。如果你問我邊個最有資格做嗰個所羅門王呢，其實就真係唔係任何位高權貴嘅人，而係真係公眾——聽眾同埋觀眾，因為去到最尾，你出到街嘅，觀眾、聽眾，咪係我哋嗰啲市民囉！佢鍾意睇嘅佢就繼續留低，佢覺得話應該要有轉營嘅，咁你都好難話呢，我就企喺度，我就唔郁㗎喇！所以理論上，所羅門王應該係呢一啲市民嘅，不過，究竟佢哋容唔容易可以表達出佢哋呢個意願，同埋真係可以發揮到影響力呢，咁就古仔照講㗎啫。」
（《頭條新聞》FB圖片）