國寶級鋼琴大師劉詩昆在港定居多年，一直到世界各地奔波為傳承藝術教育，記得8年前劉老師同前妻蓋燕鬧翻，為釐清一切，劉老師忍痛宣佈一手孕育嘅香港7間藝術中心清盤，今年劉老師與女友孫穎決定捲土重來，目標在港開辦10間藝術中心，培育孩子對音樂嘅興趣同藝術素質，劉詩昆話：「今年年底前會在尖沙嘴有間『劉詩昆孫穎鋼琴音樂藝術中心』，清盤時有7間店，這次目標開10間或多一點，超過過去，再創業了！」劉詩昆謂藝術中心着重師資，佢話：「要搵好的老師比較難，香港鋼琴音樂老師很多，但是我們想找最好的，將最好的帶到我們這裏來。」

劉詩昆同孫穎有共同理念，劉老師話：「兩個人通過自己力量，讓更多小朋友從小接觸音樂，對長大的人生有好處，成為高素質的人，藝術教育對人的自信、表達、氣質有太多好處！對於小朋友來說，可以開發他的智慧、智力，中國有古語『十指連心』，人的手指比人的腦關連最緊，所以彈鋼琴能開發靈敏、反應力，增強後人的智商就高，還有彈鋼琴能培育高品味，增加小朋友教養、氣質，和他的格調都好，對個人的文化素質更高。」

一講起藝術中心，孫穎就好起勁，為咗呢個同老師嘅「BB」，孫穎一絲不苟，籌備嘅細節如揀地方、裝修到課程探討都參與其中，孫穎話：「我哋會請兩、三個專家老師，同小朋友做測評，睇吓小朋友嘅性格特質，做好基礎教育，唔高收費，注重服務貼心。」培育小朋友嘅藝術工作，係孫穎同劉老師一致嘅理念，孫穎話：「8年前老師嘅藝術中心清盤，老師有少少心痛，佢一手創辦，我哋覺得有朝一日會重新開返，甚至傳承到一個百年品牌，有教學熱情嘅人可以入嚟呢度，心無旁鶩，好專注教小朋友，今年時機成熟喺香港再開返，都覺得好開心。」

今次大規模開辦藝術中心，投資以千萬計，孫穎話：「成個品牌深化投資比較大，香港中心每間300至600萬之間，擺設唔會豪華，風格少少北歐簡約化，反而師資投入更加多，成個品牌深化工作投資相當大資金，尤其係網絡系統化，開舖數千萬就夠，不過內地幾百間舖嘅整合要10億至20億。」

精選娛聞，喺晒《娛果》
http://fb.com/appledailyent