韓國8人女子組合OH MY GIRL嘅21歲成員JinE，因瘋狂減肥而患上厭食症，更因而要停工休養。

今日下晝，OH MY GIRL嘅事務所於官方粉絲網站表示：「JinE自出道後就出現厭食症嘅症狀，JinE已去醫院接受治療，而JinE跟公司都苦惱咗好耐，經過多次對話後，公司考慮到旗下藝人嘅健康問題，決定畀JinE暫時休息，之後嘅行程將由其他7名成員進行，休息期間公司都將盡全力支援JinE嘅治療，對於如此突然公開消息，再次向各位粉絲表達歉意。」

其實JinE早於去年10月時已因為減肥過度而要送院，JinE亦曾表示減肥係最辛苦嘅事，又話：「我係好易肥嘅體質，所以要好努力減肥，見到上次出碟宣傳時嘅相，真係好刺激我。」JinE當時於兩個月內勁減近20磅，不過佢事後就出現不良反應而要接受治療。

JinE透露佢為減肥而捱餓，採用蛋白質減肥法，又去健身，不過佢因為一時食嘢，一時又唔食，因而曾患上食道炎。