劉亦菲自從同韓國OPPA宋承憲拍電影《第三種愛情》盛傳佢哋戲假情真，話晒劉亦菲鮮少同異性傳出緋聞，唔通真係拍緊拖，據內地《全民星探》爆，日前見到劉亦菲先同媽咪去上海住咗一晚，一齊shopping跟手連夜飛返北京，原來，當晚約咗《第三種愛情》嘅導演李載漢、宋承憲等，一班劇組喺北京聚餐，食好一班人企咗喺門口傾偈，未知係唔係人太多，劉亦菲同宋承憲二人開頭毫無交流，反而，劉亦菲同導演李載漢相談甚歡，宋承憲就跟助理聊天。

當劉亦菲再同助理講嘢嗰陣，宋承憲先終於同劉亦菲講咗幾句，喺分離之時，劉亦菲與李載漢相擁而別，對宋承憲就毫無表示，原來劉亦菲同宋承憲跟手上咗同一輛車，返回劉亦菲嘅別墅區，估唔到宋承憲此行冇住酒店，借住喺劉亦菲嘅屋企，報道更指，宋承憲一直到天光都未出嚟，睇嚟關係唔似咁簡單，第二日先發現劉亦菲嘅房車駛出嚟去機場後，原來唔係劉亦菲同宋承憲現身，而係劉亦菲嘅媽咪現身，送劉亦菲嘅外公同外婆上機，盛傳係劉亦菲想帶宋承憲回家見家人。

不過，有唔少網民都質疑劉亦菲同韓國OPPA宋承憲嘅戀情係唔係為新片炒作，定係好似湯唯同韓籍老公金泰勇咁，等電影播完先公開戀情，亦有網民覺得宋承憲同劉亦菲好登對。