一代巨星柯德莉夏萍（Audrey Hepburn）粉絲要留意！佳士得拍賣行將於9月喺英國舉行柯德莉夏萍主題拍賣會，焦點拍賣品包括其名作《珠光寶氣》以及《花都奇遇結良緣》電影劇本，劇本上邊緣位置以及左面頁面，有佢親自寫下嘅筆記，非常珍貴，前者估價為6至8萬元英鎊，後者估價1.5至2.5萬元英鎊。

拍賣品唔少得柯德莉夏萍嘅靚衫。一條來自佢著名設計師好友Hubert de Givenchy手筆、藍色緞面cocktail dress，估價1至1.5萬元英鎊，佢曾經係1966年宣傳電影《儷人行》影相時著過。其他重點拍賣品仲有一件Burberry大褸，估價6000至8000元英鎊，以及多對不同顏色、佢曾穿著嘅芭蕾舞鞋，估價1500元英鎊起。

今次拍賣嘅物品全由其家族擁有，9月23至26日喺佳士得倫敦國王街總部展出，27日拍賣，部份會喺9月19日至10月3日開放網上競投。