韓國天團BIGBANG噚晚喺啟德郵輪碼頭舉行頭場騷，吸引眾星排隊朝聖，楊千嬅睇完騷後接受《蘋果》電話訪問，笑言企到腰骨痛都值得：「騷嘅製作幾好，音響、燈光各樣都有相當水準，佢哋五人好有默契，我唔係熟晒啲歌，老公有班朋友好鍾意，自己喺韓國睇過一次，今次都係第二次睇，音樂同歌嘅編曲做得好好。」

下月43歲嘅千嬅自嘲：「我係第一次企位睇，大約早個半鐘頭前到嘅，因為大會畀藝人另一個位排隊入去，可能都唔想我哋搞亂秩序，所以有分流。我未試過企位睇兩個鐘頭，我又有番咁上下年紀，所以我條腰骨好痛，但都好睇，好值得睇啲製作，我係業內人觀摩，我嗰區嘅人好熱情，識唱晒啲歌，好勁。」

噚晚都有現身嘅死忠fans連詩雅就話：「自己係BIGBANG粉絲，佢哋每次嚟香港開騷我都會睇，噚晚rundown有part佢哋每人有自己solo，我最鍾意GD嘅solo，因為五個入面我最鍾意GD，第二個就係T.O.P啦，知道佢就嚟入伍，心情有少少忐忑、酸嘅感覺，就算佢入咗伍，我都會繼續支持BIGBANG，期待再次喺台上見到五個演出。」問到離場時安排亂唔亂？連詩雅話：「我見到其實都有好多擠塞情況出現，我都好好彩，我去搭shuttle bus，好快出到去九龍灣，走嘅時候都ok，唔係等咗好耐。」