張繼聰同謝安琪（Kay）兩公婆噚日出席活動，阿Kay讚老公練到變咗加大碼，好有安全感，阿聰就話囝囝張瞻唔使等佢安排活動已經有好多節目，反而自己收工就趕住返屋企搵囡囡張靖玩。（新聞連結： https://bit.ly/2NPZcM8 ）

咁呢個大大隻隻嘅老竇會同阿女玩咩呢？答案係…人肉機動遊戲。

阿聰噚晚喺ig連上兩段片，話自己做咗人肉機動遊戲，佢屈膝坐喺地下，張靖就挨住阿聰小腿，然後阿聰扶住張靖向後跌，以小腿升起囡囡，升到半直就反手等囡囡180度安全着地，完成動作阿聰開心到拍晒手，張靖就走向鏡頭。

呢個動作當然有危險性，不過好多網民都好受落，話呢種親子互動好令人嚮往，好想玩埋一份，細細個都玩過類似嘅停唔到手之類。

為免令家屬觀眾擔心，阿聰開多個post解釋，話明呢個動作係PG家長指引：「睇完上條片，有人問妺妹有冇好驚？佢的確係好驚，好驚冇得再玩（笑）！依類親子活動其實對小朋友大腦，平衡力發展等都好有幫。」頭盔最緊要戴實先安全，阿聰話動作係經老師教導，呼籲觀眾唔好隨意嘗試。呢條片仲證明咗阿聰冇講錯，囡囡真係玩到停唔到又開心，仲排多次隊玩多次呢款人肉機動遊戲好enjoy。

精選娛聞，喺晒《娛果》
http://fb.com/appledailyent