反送中運動令港人在沉睡中覺醒，連儂牆一夜之間遍佈各區，線上線下湧現大量文宣，喚醒更多同路人上街抗爭。運動一年過後，連儂牆被極權清拆得七零八落，隨之而來則是「港版國安法」殺到。

「冇得驚，我哋唔係為咗縮沙而做，一開始做得呢樣嘢就係有覺悟，清算會搵到我。」連儂牆可以清拆，燙在民心的烙印不會磨滅。一年下來，有手足把文宣張貼上國際戰線，要連結自由世界一起對抗中共極權；有民間發起網上連儂牆，冀將港人聲音能跨越地域界限，響徹香江；即使香港民主女神被砸毀，獅子山下的民主精神始終屹立不倒。

記者 陳詠恩 張文鈴 張雅婷

文宣收集站freetoberhk：早有被清算搵上門覺悟

逆權運動前線上有勇武抗爭，後援亦有文宣推動運動。一群畫家組成「freetoberhk」透過藝術為香港記錄這段歷史，去年在網上發放與抗爭運動相關的畫題和畫作，邀請同路人投畫，一個題目最多收到過百張作品。但自從武漢肺炎肆虐，港人街頭抗爭暫停，投稿量比以往減少，反而增加回顧系列。

眾多畫題之中，最多人投畫是「催淚之城」和「這一代的兒童」。成員浮屍（化名）說：「催淚之城好多人畫，有象徵意義嘅嘢，畫面比較震撼，可能就多啲人投稿」，而「這一代的兒童」的聯想和發揮空間很大，「可能會畫一個細路喺學業同頭盔之間選擇，又會畫一個喺六四同依家嘅細路。」

做文宣要有目的

組織所收到的作品會上載至其社交媒體專頁，其中一幅命為「大話林鄭」的作品，在運動初期受到很大迴響，「嗰陣係反送中條例未撤回，幅畫係林鄭喺度喊，但另一隻手係揸住支槍，有個好似電視機嘅框影住林鄭，但就影唔到佢揸住支槍」。當時有很多人分享出去，可能是感受到現實中和媒體如何掩蓋事件，「因為嗰陣大家仲係睇緊TVB，都好反映到香港人當時感受。」

抗爭運動至今逾一年，浮屍認為如今形勢已經大不同，抗爭者需自行判斷風險，「以前你叫人去（上街），好多人都可以安全咁返嚟，但依家已經唔同。」作為一個文宣，在推動運動時亦需要多一層思考，「只要識整圖，擺上網都可以成為文宣，但你係咪做到一個好文宣呢？真係話到畀人聽，今日目的、今次要做咩行為，點樣可以好好保護自己，而唔係嗌唔出嚟就對唔住手足，你唔出嚟就係冷氣軍師。」

全國人大通過「港版國安法」草案後，香港抗爭之路更難走。她表明「唔驚得咁多」，「就算鏟晒啲嘢，本身啲嘢都喺伺服器，就算你唔係做文宣，以前講過、表態嘅嘢都一定有紀錄。你做一個文宣，某程度係鼓勵緊啲人，你同佢哋講你好堅定喺度，無論點都要齊上齊落。咩細節都未出即刻縮沙就話要鏟賬戶，好影響士氣。」

「嗰啲上街受好多虐打，失去性命嘅前線手足都未退，我哋都驚就真係當人哋係condom。」她續說：「當初唔係為咗放棄而開始，我哋唔係為咗縮沙而做，一開始做得呢樣嘢就係有覺悟，清算會搵到我。」

連繫國際聚集力量

另一成員麵包（化名）亦稱，以往抗爭運動中製作文宣已是最低成本，「識畫圖嘅畫圖，識PS就PS，按讚同分享都得」。惟《國安法》通過後，現時社會多了一層恐懼，「可能我分享或講咗我個立場，見到身邊朋友都突然間將以往分享嘅post刪咗，甚至取消追蹤」。浮屍補充說：「我知道好多網上專頁將ig轉私人戶口，唔會畀追蹤者以外嘅人睇到，原本用真身嘅人都有好強大嘅unfollow潮，又刪晒自己啲post，驚清算。」

組織原本打算在暑假出版畫冊，10月舉辦抗爭畫展：「場地都睇咗㗎喇，但突然間有個《國安法》，啲場地會唔會有疑慮唔畀搞呢，或者印刷商仲肯唔肯印本畫冊出嚟呢？」場地方面暫時未有最新回應，可能需要跟策展人商討，「一啲明喻嘅嘢可能要變成暗喻，隱晦咁講，靠參觀嘅人去領會，但個界線一定唔會係佢哋未講之前，我哋就縮定先囉。」

她又認為，文宣未來要走分析性和國際線，「單靠香港裏面嘅運動係咪可以完成到我哋想要嘅目標？其實好難。」即使港人成功推翻林鄭政府，但終極目標仍是中共極權，很難只靠香港一撮人擊倒中共，甚至將極權推倒。她說：「所以係需要國際嘅支援，反而依家要了解每個國家自身嘅問題，有冇啲嘢係我哋連繫得到」，例如全球爆發的武漢肺炎，「原來肺炎係源於中國，然後先搞到大家咁慘，大家就會多咗個共同目標同利益問題，可以聚集到國際輿論或力量，追究中國，而唔係單一人權或自由問題。」

-----------------------------
反送中一周年，《蘋果》整理大量涉及警察濫暴濫權等資料，製成詳盡資料庫，請按此閱讀圖表版本 ／純文字版本
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
App內1-Click訂閱《蘋果動新聞》
按此了解更多