美國天后瑪麗嘉兒（MariahCarey）本來10月28日喺添馬艦搞一場演唱會，點知臨門撻Q。天后點解嚟唔到就一人一句，主辦單位話門票滯銷，瑪麗嘉兒大牌兼多古怪要求；天后嘅經理人就駁斥話主辦單位拖欠尾數，歌酬收唔足唔唱。成件事最慘都係班買晒飛等睇偶像嘅樂迷，原來有啲歌迷到𠵱家仲未退到飛，收唔番啲錢。
噚日有位張先生就向馮仁昭呻，話佢買咗兩張飛，總值$2,600，佢係直接向主辦單位ONEEventsLimited買飛，點知發電郵同打電話都聯絡唔到人，收唔到退款，佢仲質疑有關公司嘅地址係假嘅，而經HKTicketing買飛嘅人，就一早退晒錢，張生話：「我已經向消委會投訴，佢哋都話聯絡唔到負責人，𠵱家研究緊下一步要點做。」
其實唔少人同張先生一樣退唔到錢，近日佢哋都喺香港討論區度吐苦水，有啲人懷疑有關方面嘅人已經走佬，又傳間公司執咗笠，大家都話啲錢凍過水。

退款期已過

馮仁昭噚日即刻去間公司喺灣仔嘅地址度睇過，原來嗰度係ONEEvents委託嘅一間秘書公司，接待員話收到好多人問有關退款嘅問題，ONEEvents交代過話叫人將invoice傳真或電郵畀佢哋，就會安排退款，但截止日期係11月30日喎，個email係[email protected]，仲畀埋查詢電話馮仁昭㖭，但就長期唔通，睇怕要等消委會做嘢啦。