【新增圖片】

歐洲騎師於這晚（20日）谷草開局連下兩城後，第三場四班一哩輪到本地薑攞威，主角蔡明紹策騎蔡約翰馬房「歡喜心」後上爆冷掄元，單Win及組合獨贏A3分別派178及30.5元，呢個雙蔡騎練組合，是季內首度合作取勝。

蔡明紹年尾手風相當不俗，早前試過在本地賽加埋遠征毛里裘斯，合共連勝四次賽事，另於12月6日谷中國際騎師錦標賽夜，以「中華盛世」連捷食尾糊，之後停咗三期冇贏馬。

今晚回師谷中，曾有馬壇神童之稱的前冠軍見習騎師蔡明紹，在第三場初騎賽前未跑過三甲的「歡喜心」突如其來，沿途近乎包尾，直路中段仍未見影，末段沿內欄直上，衝過晒所有對手，小勝0.5馬位，蔡明紹重返凱旋門，亦為「歡喜心」打破服役齋缽，加埋個人季內首度替蔡約翰立功，結局可謂一炮三響。

講番「歡喜心」呢匹四歲馬，馬主陳鈞洪養馬多年，最叻養過七捷的「哈哈妙」，且看「歡喜心」長線成就會否更勝一籌。

第三場冷馬當道，二至四名分別為「按得澄」、「華美之寶」及「靚先生」，四重彩派四萬二千幾。另外，第二口孖寶由「春盈」搭「歡喜心」呢對11號冷馬包辦，派彩達2,031.5元。