黃秋生早前應台灣公視的邀請拍攝劇集《四樓的天堂》，秋生在當地結束了14天的居家檢疫後，將會投入劇組展開拍攝工作。今日他又應好友李婉華的邀請，為網上頻道「住加女人」擔任嘉賓，婉華在訪問上不時游說秋生去加拿大，秋生連珠炮發：「我都想呀，但係嚟咗唔知做乜喎，啱啱喺 香港 諗住搞啲網絡嘅嘢，點知就搞成咁，而家活動都驚呀，打乒乓波都死，點知佢當你係乜嘢呀？喺文字上唔知點理解，個個都驚喇！邊度有得搵食咪去邊度囉，香港都冇得搵食，仲留喺度做乜嘢？連食都冇得食，唔通吸氣呀？香港空氣吸咗會飽嘅，咁又唔同喎，個個都爭住嚟喇！」他續說：「不過我將來都會去加拿大住，因為個仔都係喺嗰邊，只不過係諗去溫哥華抑或多倫多，不過個仔住嗰度好細，唔夠地方住。」婉華又表示使費不會太貴，但秋生說：「唔會好貴都冇晒錢，我而家爭人好大筆數，係一啲好大嘅債務。我而家喺台灣留2個月，之後返去搬屋，賣得就賣，收得就收，再諗下一步，返番去20幾歲一無所有嘅時候。」

秋生在其他人眼中形象很堅強，人生經歷高低起跌仍然可以捱過去，但秋生說：「我頂唔住㗎，但係頂唔住都要頂，我唔想㗎，成日都偷偷地喊。」婉華表示從來都不明白秋生錯在哪裏，只不過是發表個人意見，秋生反而覺得：「其實都睇吓你喺乜嘢嘅文明程度下，做啲乜嘢，講啲乜嘢，你就係啲乜嘢，仲要配合埋個社會同文化去睇，每一個人嘅價值都唔同。」港版國安法草案獲全國人大會議以2,878票贊成、1票反對、6票棄權通過，香港將面臨「一國一制」失去原有自由，秋生亦被問到此事，他說：「其實好多國家都有，但係嗰個立法程序，同埋點樣去執法，呢啲先係最擔心。」

婉華表示身邊有不少朋友已經刪除FB，秋生說：「我都delete晒，早幾日直頭係上唔到，借傷成毒費事上同費事講，反正我喺2個月之前，突然間覺得唔應該再喺嗰個平台同啲人糾纏，所以咪停咗。而家擺吓啲煮嘢食、飲吓茶嘅相就算，但係咁都畀佢block埋，好似連飲茶都冇資格。」雖然網絡世界無情，幸好人間尚有情，在人生低潮期，身邊仍然有朋友出手相助，他說：「喺我有困難時候，好多朋友都突然間走出嚟，好似何超儀，佢幫咗我一嘢，佢真係突然間出現。仲有最近有諗過賣點心，點知噚日有朋友問我有冇興趣搞呢啲嘢。」

有人認為目前香港處於最黑暗的時候，亦是黎明的前夕，但秋生說：「最黑暗嘅時候，未必係黎明前夕喎，啲抗黑畀你困咗喺入便，咁鬼黑暗，你又覺得一陣就畀你救咗出去？有幾多死喺入便唔知啫，唔科學，鼓勵嚟啫，漫漫長夜，有排呀！不過我覺得早好過遲，係嚟就嚟，立咗法，仲有乜嘢好驚？ 香港人 已經面對咗最惡劣嘅環境，搞得掂都唔知乜嘢世界，不如搞咗維港夜晚建築物啲光先喇，一年半載，維港啲燈全部熄，點解要熄？慳電呀，都冇錢；點解會冇錢？經濟唔好嘛！點解經濟唔好？外資撤走晒嘛！咪就係咁簡單囉，錢都冇，仲搞乜嘢執行，嘥氣！」