傘運過咗兩年，大家仍然記憶猶新。當時係靈魂人物嘅學聯中人，各有去向，前秘書長羅冠聰當選立法會議員，另一前秘書長周永康（Alex）就會負笈海外讀碩士。雖則係傘運核心，但25歲嘅Alex自稱未上大學前一直好「摺」！
咪睇Alex𠵱家年少老成咁，睇返佢細細個啲相，嘩，肥嘟嘟、唇紅齒白，好得意！Alex笑言因為面相似女仔，親戚當時成日幫佢「扮靚」，扮到小妹妹咁，但佢尷尬話呢啲相就唔好拎出來分享喇！原來佢父母每星期都會帶佢四圍去，包括到中環遮打道踩單車，因為遮打道假日係開放嘅，Alex講笑話，「細個已經佔中喇」！

讀大學前唔活躍

Alex做過港大學生會外務副會長、又做埋學聯秘書長，但原來佢小學到中學都好「摺」，憶述讀小學時因為成日要搬屋，先後讀過4間小學，成個小學生涯都係喺適應唔同校園生活中度過。上到中學亦唔係特別活躍於課外活動，都係玩吓話劇之類，冇參加學生會！點解大學會有上莊諗頭？佢透露爸爸曾經做過港大學生會長，入港大後都想試。