身為越野電單車迷的任賢齊，早前騎電單車穿越絲綢之路，沿途除細賞絲路風光外，旅程上的各種經歷也令他大開眼界。小齊目言是個自律的好男人，在路上非常小心，不過沙漠天氣變幻莫測，海市蜃樓，更令他感到人生虛無。

任賢齊早前騎着越野電單車穿梭絲綢之路，拍攝旅遊節目《一個地球──絲路遊戲》，途經沙漠與多個少數民族聚居地，小齊跟當地居民打成一片，穿上他們的民族服裝，受到熱情的款待，在一望無際的沙漠中，令小齊對人生有另一種領悟。

路途危險重重

小齊說：「喺呢個旅程，一個人喺沙漠騎住電單車，會發覺人變得好渺小，路上都有唔少危險，好似遇上海市蜃樓，個感覺好虛無縹緲，唔知以為自己撞鬼，明明係沙漠，但竟然見到城市，都唔記得自己揸緊電單車，後來回一回神先發覺係假象。」
回憶起與一眾少數民族生活的情境，小齊說：「了解佢哋嘅文化，發現佢哋生活好簡單，仍然可以好開心，然後發現咁遠嘅地方都有人認識自己，真係感到幸福同有小小自豪。」小齊表示完成旅程後，令他眼界大開，更珍惜現在所擁有的一切。

做個威威老竇

小齊不斷挑戰自己，沉迷冒險的活動，老婆Tina會否不滿？小齊說：「佢都好支持我，知道呢啲係我夢想中想做嘅事，只會叮囑我小心，當然都唔想我去太耐同太遠，我都好自律嘅，知道有家庭當然唔會亂咁嚟。」當他想到將來可以跟子女分享這些經歷時，便笑說：「第時佢哋大個，我可以同佢地炫耀吓老竇有幾威水嘛！」
採訪：胡比
攝影：陳俊強
場地提供：帝苑酒店MartiniBar