鍾鎮濤女友范姜素貞前日終誕下二人的愛情結晶,范姜前日於養和醫院誕下一名八磅半女嬰,母女平安,本來選擇自然分娩的范姜,因胎兒太大不得不進行剖腹手術。
「生命好奇妙」
阿B前日一早便陪着范姜進醫院,並入產房拍下生產過程,看着醫生從母體抱出BB,心情緊張的阿B,掩不住興奮地儍笑。阿B昨日說:「屋企多咗個新成員,大家都好開心,范姜家人喺台灣飛嚟陪佢,又有好多朋友嚟睇佢。」阿B謂他入產房陪女友產女,又拍下生產過程,感覺興奮又緊張,他說:「我覺得自己好似拍緊《ER》《仁心仁術》咁,睇住醫生抱BB出嚟嗰剎那,嗰種感覺好難形容,唔係睇電視咁簡單喎,嗰個係我個女嚟喎,當時感覺到生命真係好奇妙,我開心到係咁笑。」
阿B謂看着女友由入產房前的害怕心情,到抱着新生女兒時的溫馨表情,讓他很感動,他說:「我女友生完後第一個感覺係好肚餓,佢開刀生唔食得嘢,傷口又痛,不過到抱住BB時又話覺得冇咁痛喎。」
折現取代花籃
至於阿B的大兒子嘉浚及女兒嘉湄,也為多了一位妹妹而感到很開心,阿B謂女兒嘉湄也有陪着范姜到醫院,看見妹妹出世後即笑不攏嘴,阿B說:「佢一路好想有個細妹,佢以為BB啱啱出世唔掂得,就趁大家唔為意時摸BB塊面,點知BB咁啱要飲奶就喊,家姐以為自己整喊個妹,嚇到面都紅埋,好好笑。」
阿B謂昨日收到不少朋友的祝賀電話及花籃,他說:「我叫啲朋友唔好送花籃同生果籃嚟,不如折現包利是畀BB,當係贊助奶粉錢重實際。」問到BB改甚麼名字,阿B說:「諗咗幾個名,但未揀定,要夾埋時辰嚟揀。」
採訪:蔡如玉
攝影:王連連