【爆相爆片】今年31歲嘅「神奇小子」曹星如上年11月重返擂台,不過佢仍會忙裏偷閒,孖老婆Laam去旅行遊福岡,讀者林小姐就撞到佢哋恩愛行outlet掃貨。
日前《蘋果》讀者林小姐透過「爆相爆片」,直擊曹星如夫妻拖手仔喺福岡shopping。曹星如同老婆着住黑色運動情侶裝襯白色波鞋,手上各自拎住一袋戰利品。林小姐話:「當時大概晏晝3點,喺Tosu Premium Outlets見到佢哋,佢哋已經買咗兩袋嘢,佢太太嗰袋仲裝到脹卜卜,不過就唔知佢哋行咗幾耐,見佢哋十指緊扣,行咗去一間大眾化品牌時裝店買嘢,行到3點半左右就走。」