走過2019年首季，樓市反彈，二手高價成交頻現，新盤陸續開賣，政府新居屋超額認購62倍。租樓6年的Chatster今年初低位有錢買樓都不買，卻沒料到樓市不足半年反彈逾一成。錯過低位，對港樓死心，想到大灣區睇樓，相約港女Erica 6月13日中山睇樓。即使六四之日，Erica還跟記者協調拍攝事宜，事情發展到6.9百萬人遊行翌日……

6月10日早上，Erica透過微信回覆記者：「早，美女（記者）。抱歉，最新社會動亂嚴重，今天跟公司開會商量了，公司這邊不同意派我們的工作人員拍攝這個節目。」記者將上述回覆轉告Chatster，他不禁問：「社會動亂關佢咩事？」大灣區睇樓團隨即告吹。

接着的日子，香港人永不忘記。然而6月16日200萬人遊行後，同月29日會德豐（020）將軍澳Grand Montara開售全盤504伙即日沽清。7.21唔見人，元朗以至新界西北區交投近乎停頓，部份二手成交價回落2%至6%，然而未夠一個月，億京荃灣映日灣在8月17日進行首輪銷售354伙即日沽清。社會有人高呼：「香港人，加油！」同時社會狀況是「香港人，買樓！」別人瘋狂搶新樓，Chatster堅持租樓，映日灣沽清翌日，他覺得：「未係入市時候，等緊焦土！」

Chatster：我冇強烈肯定話永世唔買樓

8.31打死人，9月4日特首林鄭月娥宣佈動議撤回修訂《逃犯條例》，同日港股單日一度爆升逾千點。撤回修訂《逃犯條例》翌日，在鰂魚涌太古城打滾22年的中原地產經紀趙鴻運坦言：「生意麻麻。呢排租金維持，但價位回落。春櫻閣樓王由2,800萬元減至2,580萬元，除非你唔係住太古城，住太古城，呢隻係終極換樓版。呢啲單位以前得一、兩間放，但近排多返到有6、7間交吉，呢個因為市況啦！」那麼春櫻閣這個被喻為「大Dee」的樓王，目前叫價比同類單位便宜近200萬元會否賣得出？他回應：「我唔係預言家。而家好多準買家，冇mood買嘢！」

樓市沒水晶球，但身邊總有幾個樓市專家。被Erica奉若神明的樓市專家葉景強（King Sir）9月初接受訪問表示：「如果運動今天完結，年尾樓價較今年高位跌5%內，但如果持續至12月，樓價一定跌超過10%，甚至跌20%。而家（9月）最好係鋤價，如果市價500萬元就鋤15%至20%，如果還得幾個巴仙，咁就即刻成交啦！」

知道King Sir有睇法，Chatster都想去作客，出席9月11日King Sir樓市講座。講座前，Chatster表示：「幾個月嚟，睇唔到樓價插水式下跌，而家觀望態度，無強烈入市意欲。（你之前堅持不買樓喎？）嗯……即係而家會伸個頭出來望一望個價錢囉……今日來講座，聽吓佢點分析樓市，純粹聽聽。（你不覺這些樓市講座都係叫人買樓嗎？）所以更加要聽，聽吓可唔可以游說我買樓。（你轉軚？）我冇強烈肯定話永世唔買樓。」

Chatster續稱：「記得舊年睇過跑馬地舊樓600萬有300幾呎。（減幾多你會賣？）你講有衝動即買？減到400萬元咪即買囉！（點解改變多年不買樓做法？）冇呀，冇改變呀，我都係覺得樓價好貴，只不過同其他地區比較，如果我買旺角、銅鑼灣、灣仔舊樓，不如買跑馬地，即係如果我要揀，你點都要我揀，我係舉呢個例子，舉呢個價錢，跌到咁嘅波幅，我就買，首期畀一半我都可以。」

九按放寬令Chatster心動睇樓

逆權運動變抗暴之戰，3月King Sir樓市講座超過100人出席，9月舉辦僅約20人。原定近3小時講座，Chatster聽一個半小時就走，「唔累，唔悶，資料充足。佢（King Sir）講咁多原因都係正面，負面啲嘢無乜講……佢講啲資料都係公開，大家都知，唔會推進到我好想即刻買樓。佢講5年後樓市斷層，樓價唔會下跌，呢個係事實。」

Chatster續稱：「如果樓價無可能再跌，我都係偏向租住先，堅持唔買住。諗吓用第二啲方法增加我搵錢能力，從而令生活更好。唔會專登要買資產，死都要買資產。（坊間常言租樓等於幫人供樓？）你話我幫人供樓，呢個邏輯上有少少奇怪，我覺得唔係，我消費咗啫。樓係保值工具，但唔能夠話貼咗落人哋度。（有人說租樓叫租奴？）我冇所謂喎，因為買咗樓都可以叫你做樓奴！」

9月至今逆權運動越演越烈，10月《施政報告》提出放寬按保，首置客借九成按揭樓價上限將由400萬元提升至800萬元，然而樓價持續下滑，反映整體大型私樓的中原城市領先指數12月30日報177.71點，比今年6月所創歷史高位190.48點下跌，即實際反映6月初逆權運動尚未爆發時的市況，跌6.7%。樓價跌才會睇實樓市的Chatster之後不但伸個頭出來睇，而且還實際去睇樓，睇一些符合他價位的港島「4」字頭放盤，結果他還了價。口裡說不，身體卻很誠實，難道再一次被驗證？

撰文：陳家雄
採訪：陳家雄、張嘉鎣、朱得志、陳新政
攝影：S.dragon、Kin、Kenji、Gary、細釗、黃偉傑、鄭嘉峻、陳錦源

-----------------------
屬於香港人的移民攻略
立即登入【全球樓行】
Dream House零距離