日本女星榮倉奈奈噚日喺東京出席電影《圖書館戰爭TheLastMission》嘅煞科記招，同片中一眾型男拍檔都有現身，包括岡田准一、福士蒼汰、松坂桃李等等。由於有份演出嘅栗山千明上個月跌親右腳骨折，所以冇出席，榮倉就搶晒鏡，睇佢前面以為佢好密實，點知一轉背，竟然係個超級大露背，明顯冇帶Bra！

各位型男見到榮倉個背脊，個個都嚇到O嘴，福士蒼汰仲忍唔住笑。而男主角岡田准一睇到都覺得唔好意思，唔敢再望，仲忍唔住話榮倉：「你背脊係咪開得太大！」點知榮倉仲要擰轉身話：「你睇唔睇吓啫？」搞到岡田更加尷尬。而岡田同宮崎葵早前爆戀情，佢當然係例牌唔回應，只係以笑蒙混過去就算。